Surselva - Glion: «Center Marcau» è finì mez onn pli baud

Il pli grond plazzal da Glion, la surbajegiada «Center Marcau» visavi a la staziun da viafier, è sin buna via. Dapi in per emnas èn las punts demontadas e las lavurs en l'intern èn era gia fitg avanzadas. Uschè lunsch, che persunas che han reservà in'abitaziun, pon gia ir a star bunamain in mez onn pli baud a star en il bajetg.

October 2018 enstagl da avrigl 2019

Enstagl da l'avrigl 2019 pon talas e tals ch'han reservà ina abitaziun en il «Center Marcau» gia ir davent da l'october 2018 en lur abitaziuns. Tenor Nunzio Lo Chiatto da l'interpresa Berninvest, el è responsabel per il fond Immohelvetic che ha finanzià la surbajegiada, datti duas raschuns per quella midada da termins. Per ina hajan els planisà fitg conservativ ils termins e per l'autra sajan las lavurs progredidas fitg bain ils davos dus onns, meglier che planisà.

Dischavantatgs n'hajan ils novs locataris betg. Lavurs grevas che fan blera canera èn tenor Nunzio Lo Chiatto finidas, sulet en intginas abitaziuns vegnia l'october/november forsa anc mess en parchet u schubregià. Ed enfin l'october duain era tut las installaziuns tecnicas sco p.ex. ils ascensurs esser en funcziun.

Fatschentas avran fin avust 2018

Sche tut giaja sco planisà, vegnian las abitaziuns avertas en duas transchas l'october e november. Las fatschentas en las emprimas duas auzadas vegnan gia avertas la fin avust. Uschia che l'entir bajetg duess esser averts sin il pli tard la fin 2018, ca. mez onn pli baud che planisà.

RR actualitad 08.00