«Il meglier fiss sch’i na dess nagins lufs», di il president da l’uniun chantunala dals elevaturs da nursas Duosch Städler. Mo cunquai ch’el saja qua stoppian ins pudair reagir spert e prender davent lufs che fan donns. In grond problem – e da quai na discurrian ins betg – sajan la primavaira e l’atun, cura ch’ils animals sajan avant stalla ubain ora sin il pastg enturn vischnanca. Là èsi pli grev da proteger cunquai che mintga pur è per sai.
Regular el sche necessari
In dals purs giuvens da l’uniun (che ha 61 commembers) è Carlo Rizzi da Luzein cun 25 onns. El ha tranter 100 e 120 nursas. I saja in tema emoziunal, surtut sch’ins saja pertutgà sez. Mo il mument saja la situaziun uschia ch’il luf saja en Svizra ed ins stoppia guardar co ins possia s’occupar dad el e ch’ins possia era regular el, sche quai saja necessari.
Sco cun la chatscha da tschiervs e capricorns
Da la medema opiniun è Enrico Casanova da Vattiz. Nossa glieud n'haja grondas cumpetenzas da far insatge encunter il luf pervia da la convenziun da Berna. Plaun a plaun stoppian ins dentant regular els sco ins fetschia cun la chatscha da tschiervs e capricorns.
Il luf na tutgia betg tar nus
Il luf na tutgia betg tar nus, di Placi Cadalbert, el è president da la societad da nursas da Rueun. Pli baud hajan ins sragischà animals da rapina ed uss mettian ins puspè nà els. El saja persvadì ch’ins n'haja mai ditg la vardad sur dal luf. Ed avant gnanc uschè daditg saja il luf stà datiers da Rueun.
RR actualitad 12:00
