L’inauguraziun è vegnida fatga cun l’emprim gieu da segunda liga da la stagiun da l’Uniun sportiva Schluein Glion (USSI), differents gieus amicabels, la benedicziun da l’edifizi ed ina parti. Las visitadras ed ils visitaders laschan plaschair l’arena. Apprezià vegn cunzunt la tribuna d’aspectaturs che ha tetg, dentant era l’ustaria.
Tenor l’architect dal bajetg, Jan Berni è la cuminanza dal club stada centrala per la realisaziun dal bajetg. Uschia plascha era l’ustaria al president Simon Lutz, perquai ch’il club haja uschia in lieu da s’entupar.
Bler engaschi
En tut ha l’edifizi custà 1,35 milliuns francs. 670’000 èn vegnids curclads entras contribuziuns da las vischnancas da Falera, Glion, Sagogn e Schluein, dal chantun Grischun e donaturs. 430’000 francs han las vischnancas dà sco emprest senza tschains. Il rest è vegnì cuvert da l’USSI. Tranter auter cun vender prest 300 dals 500 plazs da seser. Er ils commembers da l’uniun èn s’engaschads fitg ferm per realisar l’arena ed han prestà var 6000 uras lavur cumina.