Oz suentermezdi è il provediment d'electricitad en la Surselva ed en l'Engiadina stà interrut per part. Era pertutgà è stà l'Open Air Lumnezia.
Betg laschà irrità
La gruppa «Royal Riot» ch’ha cumenzà oz il segund di da l’open air a las 14:00 n'ha en mintga cas betg laschà irrità ch'i n'ha gì nagina electricitad. Els han sunà unplugged. Il medem vala er per la gruppa «Damian Lynn» ch'ha medemamain sunà unplugged.
Actualmain han ins installà in agregat per producir electricitad, uschia che «Dodo» po puspè sunar tut normal. In segund agregat duess suandar, uschia che l'entir areal da l'Open Air Lumnezia duess puspè avair electricitad lasuenter.
Effect da dominio
Sco RTR ha intervegnì, ha in effect da domino suenter dus chametgs procurà per l'interrupziun. Uschia èn parts da las lingias electricas stadas interruttas u èn anc adina interruttas.
La raschun per las interrupziuns da l'electricitad eran ferms urizis cun chametgs e ferms vents, scriva la Repower. En la Val Lumnezia èn plirs chametgs dads en.
A medem temp, baud il suentermezdi, hai dà in disturbi sin la lingia svizra d'auta tensiun. Chaschunà il disturbi ha in urizi enturn Panaduz. L'electricitad è crudada or en l'entira Surselva sur Flem sco er a Puntraschigna. Là ha l'interrupziun cuzzà 9 minutas, en la Surselva 20 minutas.
En la vischinanza da S-chanf è ina planta crudada sin ina lingia libra, uschia ch'ì ha dà interrupziuns electricas en il circuit da Chapella, Cinous-chel e Brail, quai durant radund 4,5 uras.
RR novitads 14:00+