Ils abitants da la «Staziun 16» survegnan sper lur abitaziuns modernas era in spazi public che cumpiglia tranter auter ina cuschina cun access direct en l’iert, dus plazzas da coworking e perfin ina biblioteca. E tut quai cun fits da locaziun tranter CHF 1’500.- e 2’400.- Ina immobiglia cun in’atmosfera anonima na fiss mai vegnida en dumonda, di l’anteriur hotelier, Hansueli Baier.
Jau vuless avair qua era famiglias cun uffants che frequentan nossas scolas e scolettas.
L’edifizi nov, construì da l’architect indigen Jan Berni, è fatg cun lenn grischun e correspunda al standard d’ina chasa passiva. Grazia grondas fanestras e materials stgirs vul l’architect nizzegiar l’energia dal sulegl. Perquai è quai pussaivel ch’il stgaudament da lenn è dimensiunà da maniera modesta. La construcziun en lenn pussibilitescha era ina gronda flexibilitad entaifer las abitaziuns. In u l’auter «mir» pon ins senz’auter laschar davent u spustar, sch’ins vul.
Betg per mintgin
Enstagl d’ascensurs datti stgalas – era entaifer las abitaziuns. Tgi che vul abitar en la «Staziun 16» sto s’identifitgar cun il vitg e cun la cultura locala e sa participar en la communitad. La gronda part da las abitaziuns è gia davent – dentant datti anc la schanza sin ina ni l’autra.