Pli paucas entradas da taglia ed autas investiziuns che derivan da tschertas vischnancas che n'han betg fatg quellas avant la fusiun, sajan ils motivs principals da la situaziun finanziala mumentana, di Carmelia Maissen, la presidenta communala da Glion.
Sin incumbensa dal parlament ha la suprastanza communala da Glion elavurà in messadi che demussa tge pussaivladads che la vischnanca ha per spargnar. Il parlament n'è en sia davosa sesida dentant betg entrà en fatschenta ed ha renvià da tractar la proposta da la suprastanza communala. Enstagl da discutar ha il parlament surdà in'ulteriura incumbensa a la suprastanza, numnadamain d'examinar sche l'administraziun haja memia bler persunal.
Jau resentel or dal parlament schon era adina ina tscherta disfidanza visavi la vischnanca.
Carmelia Maissen ha dentant la speranza che la suprastanza communala ed il parlament chattan ina vista cuminaivla per schliar ils problems finanzials.
RR actualitad 08:00
