Derasà è il pass da la Surselva surtut en la regiun da Sursaissa Mundaun. Sco il cassier da l’uniun Rudolf Büchi ha ditg sajan 69% da tut ils pass da la Surselva vegnids vendids en quella regiun. Daco na possian ins betg dir. Dentant na possian ins betg cumparegliar bain las cifras da vendita avant la crisa da corona cun il temp actual. Il pass da la Surselva n’haja betg pudì prender il schlantsch d’avant la pandemia. Surtut cumpareglià cun la media da 5 onns saja l’onn actual da corona in che vegnia ad accumpagnar e influenzar las statisticas a moda negativa, uschia Rudolf Büchi.
Evità sperditas pli grondas
Per ils territoris da skis da la Surselva èsi stà essenzial ch’els han pudì avrir la stagiun passada. Quai saja d'attribuir a las stentas da las Pendicularas Grischunas e da la regenza grischuna. Uschia hajan ins pudì evitar ina sperdita da var ina milliarda francs, di Markus Good il president da las pendicularas Surselva e maina gestiun da las pendicularas da Sursaissa. Per la stagiun che stat avant porta na quintian ins betg cun restricziuns supplementaras. Era in certificat da covid per pudair ir cun skis na saja betg realistic, surtut betg ord vista logistica.
Sustegn davart da la Confederaziun e dal chantun
La situaziun da las pendicularas saja il mument difficila. Las investiziuns stoppian vegnir fatgas per restar cumpetitivs cun la concurrenza da l’exteriur. Uschia saja necessari ch’il chantun sustegnia investiziuns en futur. Il mument sajan ins anc en contractivas, ha ditg Martin Hug, il president da las Pendicularas Grischunas.