Il studi preliminar che l’Uffizi da guaud e privels da la natira dal Grischun ha fatg è sin maisa. Sco il president communal da Medel Peter Binz ha ditg, vegn l’iniziativa da quest project da persunas d’ordaifer la val. I sa tracta da persunas che sa fatschentan cun il guaud. Quellas hajan constatà che las plantas vegnan bler pli veglias ch’ils umans, e l’idea saja stà da tschertgar sponsurs che vulan finanziar insatge che vegnia pli vegls ch’ils umans. Ina planta estra custa tranter 1'400 e 1'800 francs.
Creschan plantas estras tar nus?
Il project Arboretum duai era sclerir, sche questas plantas pon crescher sut nossas cundiziuns climaticas. Tablas d’infurmaziun duain inditgar tgeninas ch’igl è, danunder ch’ellas derivan e sumegliantas infurmaziuns. Binz spera, ch’ins possia anc cumenzar quest onn a plantar l’emprima planta estra si Stagias.