L'uniun sportiva Schluein Glion ha actualmain 431 commembras e commembers ed è uschia il pli grond club da ballape da la Surselva. Sper l'equipa da secunda liga dattan anc 12 equipas da juniors, da dunnas e d'umens en differents campiunadis. Il film “Il Club” è in purtret da l’uniun e da las commembras e commembers actuals.
Plaz da balla, tribunas e gasettas
Il film mussa differentas episodas da la istorgia da l'uniun. Fotografias da l’emprim plaz da ballape 1942, da la construcziun da l'emprima chasa da club igl onn 1984 e scenas actualas da gieus e trenaments. El mussa dentant era co la gasetta dal club cun il num “90 minutas” vegn producida. Gronda paisa dat il film a dus eveniments: Per ina a la construcziun da la nova chasa dal club cun tribuna, ustaria e gardarobas, ch'ils commembers han bajegià per gronda part sez. Per l'autra al camp da trenament dal HSV la stad vargada. Dus puncts culminants en la istorgia da l'uniun sportiva Schluein Glion.
Engaschi e juniors
Il film tschenta la dumonda, daco che quella uniun haja ton success. Per ils aspectaturs è quai cler: spiert da cuminanza, engaschi persunal e la lavur cun ils juniors. La passiun da las commembras e dals commembers per l'uniun e per il ballape saja il pli impurtant. E quella passiun vegnia documentada fitg bain en il film.