La pendiculara da Cassons a Flem è vegnida serrada l'atun passà per adina. Uschia èsi mo pli pussaivel d'ir a pe sin il fil da Cassons.
Enfin ch'ils novs implants da transport sin il fil (la varianta «Y») n’èn betg construids, resta quai uschia. Quai vegn probablamain a durar 4 fin 5 onns.
Shuttle a Nagens e Graubergbahn
Sco quai ch'il directur da turissem da Flem André Gisler ha confirmà ad RTR, èsi planisà da laschar cursar il bus da shuttle Nagens mintga di da l’emna e betg mo da mesemna enfin dumengia. Quest bus va da Laax Murschetg fin la staziun sura da la sutgera Nagens. Era la Graubergbahn duai esser en funcziun durant la stad per megliurar l'access a l’arena tectonica Sardona.
-
Bild 1 von 3. La nova purschida da stad da Flem. Bildquelle: RTR.
-
Bild 2 von 3. Il plaun da Segnas, ina part da l'arena tectonica Sardona. Bildquelle: LAAX, Gaudenz Danuser.
-
Bild 3 von 3. André Gisler, il directur da turissem da Flem. Bildquelle: mad.
Nov pavigliun d’infurmaziun
Plinavant èsi planisà in nov pavigliun d’infurmaziun sur da l’arena tectonica Sardona gist sper la tegia Segnas, ina tegia dal Club Alpin Svizzer che sa chatta gist a l’ur da l’arena tectonica. Quel duai remplazzar il post d’infurmaziun che sa chattava en la staziun da muntogna da la pendiculara Cassons.