Siglir tar il cuntegn

Header

cuntegn

Surselva Surselva Romontscha: La Quotidiana en il focus

Igl è stà il tema principal a la radunanza generala da la Surselva Romontscha il venderdi saira a Vella: L’avegnir da la Quotidiana. La Surselva Romontscha vul sa drizzar a scrit a la Lia Rumantscha cun il giavisch da s’engaschar enavant per ina gasetta rumantscha.

Dus commembers da la Surselva Romontscha, Dumeni Columberg ed Isidor Winzap, han vulì ina resoluziun. Cun quella vulevan els che l’uniun pretendia in ferm engaschi da la Lia Rumantscha per la Quotidiana. Ma ils commembers da la SR n'han betg vulì quai. I ha dà dumondas sco: pon ins votar sur d'ina resoluziun sche quest tema n'è betg tractandà e n'èsi betg meglier da laschar lavurar la Lia Rumantscha senza intervegnir en tala moda.

Dumeni Columberg vul ina resoluziun.
Legenda: Dumeni Columberg vul ina resoluziun. RTR, Hubert Giger

Betg impedir la lavur da la Lia Rumantscha

«Da principi essan nus tuts da l'opiniun ch’igl è evident impurtant che la Surselva ha ina gasetta rumantscha», di il president da la Surselva Romontscha Vitus Gartmann. La finamira da la suprastanza na saja dentant betg dad impedir la lavur che la Lia Rumantscha fetschia il mument per sclerir l’avegnir da la Quotidiana.

audio
Bunura: Surselva Romontscha davart ina gasetta rumantscha
ord Actualitad dals 19.05.2018.
laschar ir. Durada: 2 minutas 13 Secundas.

Signals positivs da l'editur

Il secretari da la Lia Rumantscha Martin Gabriel ha preschentà la lavur actuala. L’editur da la Quotidiana haja dà signals positivs per ina gasetta dal di rumantscha. Ils 28 da matg hajan els in'ulteriura seduta en la gruppa da lavur cun las medias rumantschas davart il tema: Quant text dastgan ins metter online per ina gasetta futura.

Nov Tschespet

Sin il program da lavur da la SR stat l'ediziun dad in Tschespet cun istoriettas da l'anteriur advocat e cusseglier guvernativ Donat Cadruvi. Plinavant vul la SR edir il cudeschet da Tonja Pelican: "Emilia ed ils quints" ed il cudesch da fantasia "Oranja" da Stella Sennhauser. Quest cudesch per giuvenils cumpara en rumantsch e tudestg.

Nov suprastant è Marc Elias Solèr

Sco nov en suprastanza da la Surselva Romontscha è Marc Elias Solèr da Cuira vegnì elegì. El succeda ad Andrea Kobler. Donat Nay stat enavant a disposiziun sco delegà da la SR en la suprastanza da la Lia Rumantscha.

RR actualitad 08:00

Artitgels legids il pli savens