Las medias n’èn betg stadas giavischadas a la radunanza extraordinaria dal vischinadi da Rueras. Il president dal vischinadi Vigeli Giossi ha dentant sitg suenter ch’i haja dà nagins votums negativs davart la proposta da metter a disposiziun la chasa da scola per dar albiert a requirents d’asil. «Jau hai profundamain plaschair, ch’il patratg uman regia anc tar ils da Rueras» ha el ditg a Radiotelevisiun Svizra Rumantscha. Era il president communal da Tuejtsch, Beat Roeschlin ha gì plaschair dal cler resultat: «Il pli impurtant è che la populaziun da Rueras stettia uschè solidaric davos questa decisiun»
Anc decidì nagut
Sco proxim vegn la vischnanca da Tujetsch a contactar il chantun e far amogna la chasa da scola da Rueras per dar albiert a requirents d’asil. Silsuenter èsi il chantun che decida sche la chasa da scola da Rueras vegn insumma en dumonda e tge midadas ch’i duvrass vi dal bajetg per pudair ademplir las pretensiuns. Era sch’il chantun sa decida da betg trair a niz la scola da Rueras, è Beat Roeschlin persvas ch’il segn d’umanitad ch’ils da Rueras hajan dà cun questa decisiun restia e sin quai saja el fitg losch.
Proposta vegnida ord la populaziun
La proposta da duvrar la chasa da scola da Rueras sco dimora per requirents d’asil è vegnida fatga a chaschun da l’ultima radunanza communala da Tujetsch dad in vischin. Suenter il 2008 n’èsi betg pli vegnì dà scola en la chasa da scola a Rueras.