Suenter l'incendi en la Ruinaulta vegn visibel il donn, ch'el ha causà: Pertutgà è en emprima lingia il guaud. In guaud, che stà sut protecziun e ch'è impurtant per la situaziun da flora e fauna en la Ruinaulta. Il donn vi dal guaud en sia funcziun natirala saja perquai bler pli grond che quel mesirabel en francs e raps – quai ha ditg il selvicultur da Trin, Christian Malär, en discurs cun RTR. L'incendi da cultira, ch'era rut ora il mardi suentermezdi en la Ruinaulta, è vegnì stizzà gia il mardi saira.
2 helicopters e 60 pumpiers en acziun
La polizia chantunala era vegnida avertida las 17:10, ch'i sa derasia ina fimera tranter las staziuns da tren da Trin e Versomi-Safien, communitgescha ella la mesemna avantmezdi.
Ils pumpiers da Flem, Trin e Glion èn stads en acziun cun ina sessantina da persunas. En il territori pauc bain accessibel èn els vegnids sustegnids da dus helicopters tar l'acziun da stizzar. Per la segirezza da las persunas cumpigliadas en l'acziun eran quatter samaritans sin il lieu.
Vers las saira las 21:00 han ils pumpiers pudì stizzar l'incendi per gronda part. La notg han ina guardia surveglià pussibels gnieus da fieu.
Strasarsa vegn ad esser la raschun per il fieu
Tenor emprims mussaments saja l'incendi rut ora pervi dad in giatter da segirtad tar ina pitga da la lingia da tren: Il giatter saja cupitgà sin la lingia ed i haja dat ina strasarsa, in cirquit curt, che ha dat fieu a la bostgaglia e prada. Quella ha ars sin ina surfatscha da radund 100x200 meters, scriva la polizia vinavant.
Tren curseschan puspè dapi il mardi la damaun
Dal fieu era er la Viafier retica pertutgada. Pervi da l'incendi datiers dal binari eran ils trens tranter Reichenau e Glion vegnids remplazzads la saira cun bus.
Sin dumonda da RTR aveva la pledadra da medias da la Retica, Yvonne Dünser, confermà la mesemna la damaun, che la lingia da tren tranter Reichenau/La Punt e Glion era puspè averta.
L'infrastructura da la Viafier retica n'è betg vegnida donnegiada tras il fieu.
-
Bild 1 von 11. In da dus helicopters ch'eran en acziun per gidar da stizzar il fieu en il territori pauc bain accesibel. Bildquelle: mad polizia chantunala.
-
Bild 2 von 11. Entras il vent furius è quest giatter vegnì stgarpà ord la fixaziun. Bildquelle: RTR, Linus Livers.
-
Bild 3 von 11. I arda en la Ruinaulta. Bildquelle: RTR, Martina Caprez.
-
Bild 4 von 11. Brischament en la Ruinaulta. Bildquelle: RTR, Alice Bertogg.
-
Bild 5 von 11. La polizia ed ils pumpiers eran vegnids alarmads pervi dad in fiment en la Ruinaulta. Bildquelle: mad polizia chantunala.
-
Bild 6 von 11. Il pumpiers attatgan il fieu communablamain cun ils helicopters. Bildquelle: RTR, Linus Livers .
-
Bild 7 von 11. Dus helicopters sgolan permanent cun aua da stizzar. Bildquelle: RTR, Linus Livers .
-
Bild 8 von 11. Dus helicopters sgolan permanent cun aua da stizzar. Bildquelle: RTR, Linus LIvers .
-
Bild 9 von 11. Ina part dals pumpiers astga far pausa. Bildquelle: RTR, Linus Livers .
-
Bild 10 von 11. Dapertut sa chattan anc ignivs da fieu che ston vegnir stizzads. Bildquelle: RTR, Linus Livers .
-
Bild 11 von 11. Ina surfatscha da 450 x 150 meters è daventada unfrenda dal fieu. Bildquelle: RTR, Linus Livers .
RR novitads 22:00 / 06:00++