Tenor ina communicaziun da medias da la Fundaziun Vacanzas en edifizis istorics, ha la Fundaziun Wüstenrot da la Germania premià la renovaziun dal Türalihus a Valendau cun ina summa da 6'500 €. Tenor la Fundaziun Wüstenrot saja la renovaziun succedida cun midadas minimalas vid il bajetg dal 15avel tschientaner. Las lavurs da reparatura sajan vegnidas fatgas a moda tradiziunala e las novas installaziuns na hajan betg destruì l'autenticitad e l'individualitad dal Türalihus.
Il premi da la Fundaziun Wüstenrot è gia il segund premi che la Fundaziun Vacanzas en edifizis istorics ed il biro d'architectura Capaul & Blumenthal obtegnan per la renovaziun dal Türalihus. L'october 2015 avevan els gia cuntanschì il segund plaz dal premi "Constructive Alps 2015".