A Trun aveva la calustra Gaby Cajacob decorà ils altars laterals per la messa da scola da glindesdi ils 14 d'avust. Il di suenter ha ladramenta profità da las fluras. «Mesemna la damaun sun jau ida en baselgia ed hai constatà che las orchideas eran davent», raquinta la calustra. Ella na sa anc adina betg chapir. «Quai mudregia mai fitg. Las fluras n’han betg custà il mund. I va per il principi», manegia ella en discurs cun la FMR.
Betg be a Trun
Dapi lura è passà in mais e la ladramenta ha visità ulteriuras baselgias. A Rabius ha il caluster chattà cups vits senza orchideas. A Cumpadials han ins engulà las fluras davant l’altar. Or da la parochiala da Sumvitg han ins prendì chandailas lungas ed a Tersnaus mancan las fluras che la calustra aveva mess davant l’altar. Er là ha glieud clandestina che nagin ha vis a vegnir u ad ir, visità la baselgia cun intenziun clera.
Era la baselgia parochiala catolica da Glion ha gì visitas. Mathilda Derungs è responsabla per las decoraziuns en quella baselgia. Suenter Nossadunna d’avust aveva ella plazzà davant l’altar principal quatter ortensias en cups alvs e dus arranschaments cun fluras frestgas. La medema saira dals 28 d’avust ha la calustra constatà che glieud n’era betg entrada en baselgia per urar en silenzi, ma per engular flurs.
-
Bild 1 von 4. Las flurs davant l'altar da Glion avant l'enguladitsch. Bildquelle: FMR.
-
Bild 2 von 4. Be paucas flurs han ils laders laschà en la baselgia, . Bildquelle: FMR.
-
Bild 3 von 4. Las orchideas sin l'altar da Trun. Bildquelle: FMR.
-
Bild 4 von 4. Be il vasch resta suenter la visita da la grifla lungas. Bildquelle: FMR.
Nagina lumparia
Tant a Glion sco a Trun èn las responsablas pertschertas ch’i n’è betg in malfatg che pretenda in’accusaziun. «Igl n’è betg in cas da polizia. Tuttina èsi in cas curius», manegia Gaby Cajacob. Tant Gaby Cajacob sco Mathilda Derungs èn persvadidas ch’ils divers cas d’enguladitschs da flurs e chandailas las davosas emnas n’èn betg ina lumparia da buobanaglia. «Igl è ina garmaschia d’ina u pliras persunas che san precis tge ch’ellas vulan». Dal la medema opiniun èn era las calustras ed il calusters a Glion, Cumpadials, Rabius, Tersnaus e Sumvitg. «Quels che prendan flurs, prendan era auter», di Mathilda Derungs.