Il servetsch d’urgenza tranter Laax ed il pass Alpsu vegn organisà a partir dal 2024 da nov. La fasa da pilot ha cumenzà suenter Pasca, la finamira è da nizzegiar meglier las resursas e far pli attractiv il servetsch per ils medis da chasa, quai scriva l’uniun dals medis da chasa da la Surselva. La raschun è che l’uniun chantunala dals medis da chasa ha abolì il contract cun il chantun. Quai haja surtut da far cun la mancanza da medis da chasa, pertge pli paucs e pli grev d’ademplir il servetsch d’urgenza, uschia Patric Maissen il president da l’uniun dals medis da chasa en Surselva. Per vegnir da far frunt a las sfidas datti dapi il november in numer da telefon d’urgenza «Medgate» nua ch’expertas ed experts cusseglian co agir vinavant. Sche quai è necessari vegn clamà alura ina ambulanza u cusseglià da far ina visita tar il medi. Ils custs per la cussegliaziun al telefon surpiglia la cassa da malsauns.
A partir dal schaner sulet ospitals responsabels
La consequenza è ch’ils ospitals èn responsabels en l’avegnir per la gronda part dals cas urgents. Ils medis da chasa restan dentant responsabels per il servetsch d’urgenza normal, vul dir in medi ha era servetsch d’urgenza per ils cas pitschens, sco mal il culiez u auters mals. Dentant per il 144 n’èn ils medis da chasa betg pli responsabels. Uschia èn ils ospitals dumandads ed obligads d’organisar quest servetsch, ma era là manca il persunal. Perquai veglian tuts mirar da chattar ina soluziun che cuntenta tuts e collavurar era en l’avegnir stretg, pertge la medischina d’urgenza po sulet vegnir schliada cun agid da tuts e cun ina collavuraziun stretga declera Patric Maissen.
Far pli attractiva la professiun
Ina dals raschuns è era ch’ins veglia far attractiva la professiun dal medi da chasa. Medis giuvens che vesan quant servetsch d’urgenza che quai vala da prestar, na vulan alura betg surpigliar ina tala responsabladad. Perquai questa midada, ma surtut perquai che las resursas mancan, e qua stoppian ins vesair la realitad, sch’ins na vegn betg pli da prestar tut uschia Patric Maissen, il president da l’uniun dals medis da chasa en Surselva.
