In resultat fitg cler hai dà tar las elecziuns per il presidi communal da Sumvitg: Sco quai che la vischnanca da Sumvitg communitgescha, è elegì Patrick Schaniel (Sumvitg) cun 398 vuschs – quai tar in pli absolut necessari da 270 vuschs. El è gia stà chanzlist a Sumvitg ed è vegnì purtà dal vischinadi.
Ses cuntracandidat Marc Cathomas (Surrein) sto ceder cun 57 vuschs. Quai tar ina participaziun da radund 60%. El n'era betg vegnì purtà dal vischinadi, mabain dad ina gruppa d'abitants.
I n'è però betg restà tar il duel dals dus candidats uffizials: Survegnì vuschs ha era Giusep Bearth (Sumvitg) – numnadamain 62 vuschs.
Era per ils quatter posts da suprastanza hai dà elecziuns. Là n'han però betg tuts cuntanschì il pli absolut da 194 vuschs, uschia che 1 post da suprastanza resta vacant per il mument. Elegids ed elegida en suprastanza èn:
- Rest Andriu Bearth (Sumvitg) cun 460 vuschs
- Cornelia Cathomas (Surrein) cun 382 vuschs
- Gion Battesta Huonder (Cumpadials) cun 447 vuschs.
Ultra da las elecziuns ha Sumvitg era decidì en votaziun davart il project «Ovra hidraulica Cumpadials». Quel è approvà cleramain cun 453 vuschs Gea encunter 80 vuschs Na. Qua è la participaziun stada tar radund 58%.