Il preventiv da quai plazzal munta a circa 25 milliuns francs. L'avust 2013 han las lavurs entschet. Bajegià vegn i duas rundellas ed ina punt sur il Rain vi. L'avertura da quai sviament è planisada per la fin 2016. Questa stad vegn dentant gia averta ina emprima rundella dal sviament.
Via serrada per tut il traffic
La rundella sa chatta da la vart dretga dal Rain, da la vart da la val Lumnezia. Tenor René Simeon da l’uffizi da construcziun bassa dal chantun, sto ina part da la via S. Martin, la via che maina en val Lumnezia, vegnir bajegiada da nov.
Davent da l'avust, durant circa 6 emnas, è la via serrada cumplettamain per tut il traffic. En quai temps vegn il traffic manà tras la zona d’industria da Glion, sper il santeri ora enfin la rundella pertutgada. Davent da la rundella san'ins lura puspè ir sin la via existenta.
La punt dal sviament è gia bajegiada enfin sur la lingia da la Viafier Retica. Tenor plan duess la miraglia da la punt esser finida enfin l'entschatta 2016. Sche na dettia betg incaps pli gronds, quinta René Simeon, che las lavurs giajan a fin sco planisà. L'avertura uffiziala dal sviament duess succeder la fin october 2016.
-
Bild 1 von 3. Survista da la zona d’industria cun la rundella en construcziun (amez). Bildquelle: RTR, G. Hosang.
-
Bild 2 von 3. Dretg il lieu nua che la rundella dal sviament vegn bajegiada. Il traffic vegn manà per 6 emnas atras la zona d’industria da Glion (sanester) ed enturn il santeri (amez sutvart). Bildquelle: RTR, G. Hosang.
-
Bild 3 von 3. Stan actual da las lavurs vi da la punt sur il Rain vi. Bildquelle: RTR, G. Hosang.