Per il bajetg da la Tgasa s. Clau a Curaglia, ch'è dapi il 2014 vida, datti plans concrets. Sco quai che la radunaza communala è vegnida infurmada èsi previs da transfurmar il bajetg en in hotel da cultura e natira.
Csaba Késér ha 49 onns, stat ad Yverdons-les-Bains e manass quest hotel sco interpresa da famiglia. Ina finamira fiss da nizzegiar sinergias ed organisar eveniments da cultura cun partenaris.
Hotel cun 40 letgs
Impurtant saja era da cuschinar cun products da la regiun, di Csaba Késér. Sia finamira è d’avrir il hotel cun almain 40 letgs la stad 2016. Vid il bajetg vul el dentant far mo pitschnas midadas.
