Var 10’000 francs ha la plattafurma cun ruschnera e ballabaina custà. Sper l’agid finanzial indigen entras l’Uniun da Giuseppas e Giuseps è la vischnanca da padrinadi Geroldswil sa participada cun ina summa. Tenor il president communal da Trun Dumeni Tomaschett è il padrinadi cun la vischnanca da Geroldswil impurtanta.
Uschia po la vischnanca realisar projects che vegnissan probabel mai realisads. Per Geroldswil èsi il plaschair da pudair gidar ina vischnanca muntagnarda. Il president communal da Geroldswil, Michael Deplazes manegia ch’i saja grev per ina vischnanca muntagnarda da pudair lavurar economic ed uschia saja quai ina onur per els da gidar. Impurtant per omaduas vischnancas è dentant era il barat d’experientschas. Las vischnancas possian emprender ina da l’autra, di Michael Deplazes.
Il padrinadi da Geroldswil è naschì suenter las malauras dal 2002 cura che Geroldswil è s'engaschà per Schlans. Suenter la fusiun da las duas vischnancas da Schlans e Trun èsi stà cler per Geroldswil ch’i dat il padrinadi cun la vischnanca da Trun.