Siglir tar il cuntegn

Header

cuntegn

Surselva Tschertgà: 1,5 milliuns francs – Las pendicularas Val dovran raps

Per recaltgar quests daners ha il cussegl d’administraziun orientà ils acziunaris dad in model da finanziaziun. Previs èsi, che la vischnanca, ils possessurs dad abitaziuns secundaras ed ils hoteliers dattan daners.

La situaziun finanziala da las pendicularas da Val è pauc buna: La proxima stagiun d’enviern pon las pendicularas da Val surmuntar grazia al credit dad 800’000 francs che la vischnanca ha dà. Ma ellas èn en ina situaziun difficila.

Il resultat dal rapport da fatschenta 2017 mussa ina sperdita annuala da 786’716 francs (2015/16: -129’933 francs; 2014/15: -461’043 francs). Il quint da bilantscha serra cun in minus da 2'128’832 milliun francs.

Il model per generar 1,5 milliuns francs

La finamira da las pendicularas è da vegnir liber dal tuttafatg da ses debits. Per far quai duai servir il model suandant.

  • La vischnanca da Val duess dar 500’000 francs.
  • La taglia sin immobiglias vegn auzada da 1 sin 2 promils.
  • Ils hoteliers duessan pajar 1'000 francs per letg
  • Ils possessurs dad abitaziuns secundaras duessan pajar 500 francs per letg.

Las taxas actualas d'hotels ed abitaziuns secundaras crodan davent.

Il cussegl d’administraziun

Avrir la box Serrar la box

Novs en il cussegl d’administraziun da las pendicularas da Val èn Artemis Truffer ed Andreas Schmid. Il president Robert Berni ed er ils cussegliers Ralf Brot e Manuel Aeschbacher èn vegnids reelegids.

Ils da Val vulan salvar lur pendicularas

Il tenor a la radunanza dals acziunaris da las pendicularas da Val è stà, ch’ils da Val vulan salvar lur pendiculara. Be ina dunna che posseda in'abitaziun da vacanzas ha fatg valair, ch’ella na possia betg pajar 500 francs per letg. Ella avess da pajar 3'000 francs ad onn.

Ina dumonda è stada sch'intgins hoteliers na faschessan betg concurs, sch’els stuessan pajar 1'000 francs per letg. Sco Robert Berni, il president dal cussegl d’administraziun da las pendicularas da Val, ha ditg sajan els en contact cun ils hoteliers.

In pass vinavant per la vischnanca

Per il president da la vischnanca da Val, Stefan Schmid èsi in pass enavant per salvar las pendicularas. Ad ina da las proximas radunanzas communalas stoppian ins preschentar ina revisiun da la lescha da taglia (perquai che la taglia sin immobiglias vegn auzada) ed ina revisiun da la lescha davart las taxas da cura.

Pendicularas han da ponderar ina strategia per l'avegnir

A la radunanza dals acziunaris han intginas persunas dentant er pretendì, che las pendicularas fetschian patratgs per ina strategia futura e surtut er davart la dumonda d'endrizzar pli blers indrizs da far naiv.

Critica ha quai era dà pervia dals custs da persunal che sajan creschids. Robert Berni ha respundì, che quests custs sajan creschids dapi ch’il restaurant Gadastatt saja en funcziun.

RR novitads 06:00

Artitgels legids il pli savens