L'idea da sa participar cun ina bartga grischuna vegn da Martin Cavegn da Sedrun. El ha udì dad in anteriur convischin da Tujetsch da questa occurrenza ad Eglisau. «Nus vulain gea adina che noss giasts vegnian tar nus en vacanzas» e perquai manegia Martin Cavegn vinavant ch’i saja era ina giada dad ir sco grischun en la bassa a sa mussar tar ils giasts ch’ins spetga ch’els vegnian tar nus.
Per ch’ils millis d’aspectaturs che vegnan spetgads per las cursas vesian era ch’i sa tractia d’ina bartga grischuna dovra quai natiralmain era insatge visual. Gugent avess Martin Cavegn mess davant da la bartga empè dal chau dal dragun in chau d’in capricorn. Mo las bartgas sajan charas ed ins na possia betg simplamain far quai. Ma vid la bartga haja quai segir ina bandiera grischuna di Martin Cavegn.
Infurmaziuns
I manca anc rembladers
La bartga reservada è ina bartga che dovra 50 rembladers. Anc n’è la bartga betg plaina. Sco Martin Cavegn di manchian anc 10 fin 15 persunas. Abilitads spezialas na dovrian quellas betg. I dettia ina instrucziun avant la cursa. Il tambur che dat en il tact ed il commando ed il navigatur sajan persunas cun experientscha. Uschia è Martin Cavegn persvas ch’i reussescha da remblar ils 400 meters dal Rain giu e lura puspè dal Rain si fin al lieu da partenza.