Roman Flepp e Curdin Friberg èn ils chaus creativs davos il project da «UKENIKE». Il gieu che ha sias ragischs en la Rumantschia è en il mument fitg dumandà en l'internet. Gieus da tavla èn ozendi plitost or da la moda e vegnan remplazzads tras gieus da computers e consolas. La finamira dals dus sursilvans era da laschar reviver la fascinaziun davos ils gieus da tavla.
Insacura ha ins era avunda dal digital. I fa magari er bain da sa dar giu cun insatge simpel.
«UKENIKE» - u che... ni che...?
«UKENIKE» san ins dar cun dus fin quatter giugaders. «UKENIKE» è atgnamain in entir pachet da gieus perquai ch'ins sa dar il gieu en tschintg differentas modas e manieras. Uschia è la finamira era mintga giada in'autra. il focus dal gieu resta dentant adina il medem. Ins sto stuschar cun schlantsch ses craps pitschens encunter quels dal opponent.
-
Bild 1 von 4Legenda: «UKENIKE»: il gieu cun stil ed plain divertiment. MAD
-
Bild 2 von 4Legenda: Ils dus inventaders: Curdin Friberg e Roman Flepp MAD
-
Bild 3 von 4Legenda: «UKENIKE» in dals gieus «Fortuna». MAD
-
Bild 4 von 4Legenda: Il gieu «UKENIKE» cun las ragischs en il Grischun. MAD
L'acziun da «Crowdfunding» è in success
Blers onns eran Roman Flepp e Curdin Friberg stads adina puspè vid optimar il gieu. «Sch'ins mira sin ils emprims concepts dal gieu e cumparegliass els cun ussa. Lura è quai uss tut insatge auter», di Roman Flepp. Pass per pass han els sur onns creà in gieu, tochen ch'els èn decidids da lantschar ina campagna da «Crowdfunding». Immediatamain han els gì grond success. Sin la pagina d'internet kickstarter.com han els entaifer sis dis pudì rimnar 8'400 francs ch'els dovran per ch'il project gartegia. La glieud che sustegna lur project survegn per suenter ses agen exemplar dal gieu. Cunquai che la campagna terminescha pir en 18 dis, vegn la summa probablamain anc a crescher vinavant.
RR actualitad 12:00