Ina giada ad onn sa scuntran ils possessurs da las abitaziuns da vacanzas en las trais chasas Selva, Zervreila e Tomül a lur radunanza da condomini. Quest onn han ils preschents constatà cun surpraisa, che la 7132 SA ha acquistà la maioritad en 2 da 3 chasas d’abitaziuns.
Las 3 chasas èn impurtantas per la tur da 381 meters
Las trais chasas Selva, Zervreila e Tomül furman ensemen cun l’hotel Therme e la terma sez il cumplex da la terma a Val S. Pieder. Ellas giogan ina rolla impurtanta per realisar il project ambizius da la tur giganta da 381 meters autezza, che la 7132 SA da Remo Stoffel planisescha - cun quai ch'il sochel da la tur gigantica vegniss a star amez ellas en.
Dapi la cumpra da la terma l’onn 2012 è Remo Stoffel londervi, da cumprar en las trais chasas las abitaziuns, ch’èn en possess da divers privats. Ina part da las abitaziuns en las chasas tutgava gia a l’hotel Therme cura che quel era anc via la Hoteba en possess da la vischnanca da Val.
Tge che vegn a succeder n'è betg enconuschent
La survista da las relaziuns da possess sa mussa per propi pir a las radunanzas annualas cura ch’i va per la maioritad da vuschs. Tge che vegn a succeder, sche la 7132 SA ha la maioritad en tut las chasas n’è betg resortì a la radunanza da condomini. Fatg è ch’ella impona tut las forzas per cumprar las abitaziuns che na tutgan anc betg ad ella e survegnir uschia la maioritad.