Cunzunt per las persunas che lavuran a Glion è quai ina situaziun malempernaivla. Ellas ston charrar sur Dutga e Valendau per ir a Glion. Quai vul dir enstagl d’in viadi da 7 km in viadi da 20 km, enstagl da 15 minutas in viadi da 40 minutas.
Per las persunas che èn era durant il di a Riein ni che lavuran a Riein, vul la via serrada cunzunt dir esser flexibels. Ellas na san betg pli ir “dabot giu Glion a far cumissiuns”.
Era intgins purs ston far viadis bler pli lungs che normal da lur stallas enfin ils funs. Indemnisaziuns dal chantun na dat i dentant betg per quellas expensas supplementaras.
Cun ils privels da la natira han ils abitants da Riein emprais da viver. La via è anc mintgatant serrada pervia da bovas ni lavinas. Ir insanua auter a star pervia da quels privels na vul dentant nagin abitant da Riein.