Sursilvan a la testa dal Spital regiunal Surselva

A blers è el enconuschents sco president da Surselva Turissem, sco deputà da la Lumnezia e manader da la fracziun da la PCD en il Cussegl grond. Marcus Caduff da Morissen è il nov directur dal Spital regiunal Surselva.

Purtret da Marcus Caduff. Bild in Lightbox öffnen.

Legenda da maletgs: Marcus Caduff è maridà ed è bab da duas figlias, in da ses hobis e sgular. El ha il brevet da pilot. RTR, L. Livers

Marcus Caduff ha studegià agronomia ed è sa perfecziunà cun studis supplementars en l’economia. Dapi 4 onns lavura el en il ospital chantunal da Cuira sin il sectur svilup da manaschi. Sco quai ch’il cussegl d’administraziun communitgescha vegn Marcus Caduff a cumenzar sia lavur a Glion il schaner 2017.

Ils ultims onns hai dà tar la plazza da directur dal Spital regiunal Surselva ina pulita fluctuaziun. L’onn 2010 ha Franco Hübner bandunà il spital suenter 10 onns. Suandads èn Marcel Baummann, Mario Evangelista ed Urs Kellenberger.

Cun l’elecziun dal sursilvan Marcus Caduff spera il cussegl d’administraziun d’avair elegì ina persuna che porta ruaus en il spital. Quel sto actualmain remplazzar il chau-medi e cumbatter cun mancanza da persunal.

RR novitads 10:00