La vischnanca da Trun vul realisar occurenzas per il giubileum da 600 onns Ligia Grischa. Cun 13:0 vuschs ha il cussegl da vischnanca approvà il credit per la realisaziun da las festivitads da 873’000 francs (+/- 10%). Quintà vegn cun entradas da 373’000 francs. Uschia restass a la vischnanca custs da maximalmain 500'000 francs.
Fundaziun è stà in eveniment istoric
La fundaziun da la Ligia Grischa l'onn 1424 a Trun è stada in eveniment istoric da gronda impurtanza per l'entir chantun Grischun. Perquai ha la suprastanza communala installà ina gruppa da lavur che s’occupa cun las preparativas per las festivitads 600 onns Ligia Grischa. La gruppa da lavur ha elavurà in program «Sut igl Ischi 2024», in concept ed in preventiv per il giubileum. Previs èn trais occurenzas pli grondas, sco Magnus Manetsch da la gruppa da lavur ha declerà ad RTR:
La Ligia grischa sin viadi istoric: Questa occurenza sa cumpona d'ina seria da concerts dal Chor viril Ligia Grischa. Era chanzuns sco «A Trun sut igl ischi» u «La Ligia Grischa» vegnan resguardadas. Ed i dess era dar ina cumposiziun nova.
Detga(s) e fatg(s) d'ina perdetga metta: Raquintada vegn l'istorgia da l'ischi a Trun. La furma è in concert cun ina cumposiziun contemporana. I dat ina part chant, film e maletgs istorics che vegnan cumbinads cun questa musica.
Teater el liber «Ligia 2.0»: I duess dar in teater popular cun resguardar las atgnadads da Trun e cun dar in sguard enavant. Il crutsch cun la Ligia Grischa sto esser dà. Previs èsi che acturas ed acturs laics da Trun e conturns giogan il toc, probabel en il curtin d'onur sut l'ischi. La finamira èn 10 producziuns.
Las producziuns vegnan rapreschentadas dal mars fin l'avust 2024. Per che l'eveniment da 600 onns Ligia Grischa restia en memoria vul ins documentar quel cun in film. Il concept n'è dentant betg anc elavurà en detagl.
Sco proxim ston votantas e votants da Trun decider davart il credit da 873'000 francs.
Preventiv 2022 prevesa deficit
Ultra da quai ha la vischnanca approvà il preventiv 2022 che quinta cun in deficit da 148'000 francs sco era fixà il pe da taglia sin 105% da la taglia chantunala simpla.
Ord l'archiv
Fotografias e documentacziuns da nossistorgia: Ligia Grischa 1424 Trun