Stuair prender cumià da las sutgeras n'è betg uschè simpel per ils da Flem. Bleras regurdientschas d’uffanza èn colliadas cun ellas. Generaziuns entiras han grazia questas sutgeras emprendì d'ir cun skis.
Las sutgeras da Flem si Foppa e Naraus tutgavan tar Flem sco il Lai la Cauma ed il Crap da Flem.
Innovaziun mundiala
Construidas dal 1945 e 1947 eran quai las emprimas sutgeras accuplablas, ina innovaziun mundiala che ha fascinà giuven e vegl. Vers la fin dals onns otganta èn las sutgeras lura vegnidas remplazzadas cun models pli gronds e pli moderns, che han fatg lur servetsch fin al di dad oz.
Remplazzadas vegnan las sutgeras puspè cun ina innovaziun mundiala. L’emprima pendiculara nua ch’il giast po decider sez en tge staziun ch’el vul ir. Gia l’onn passà han las emprimas lavurs cumenzà. Sin la stagiun d’enviern 2023/24 duessan las emprimas duas secziuns da Flem si Foppa e Startgels ir en funcziun. Si Naraus vegni però pli quiet. En l'avegnir pon ins be pli cuntanscher il restaurant a pe.
