Sia lavur saja da colliar e crear raits da contacts, attribuir projects a programs da promoziun ed er d'accumpagnar projects, resumescha la sviluppadra regiunala, Céline Meury. Promover il svilup economic na munta uschia betg ch'ella fa lavur d'ina lobista economica, mabain ch'ella cusseglia glieud ed instituziuns che s'annunzian tar ella cun bunas ideas.
Natiralmain è il svilup economic ina part impurtanta ed gronda da mia lavur, ma ella cumpiglia er auter temas che fatschentan la regiun.
L'onn passà saja la strategia davart il svilup stada en il center da sia lavur. Ils principis directivs, pia ils puncts da promover, ha il post per il svilup regiunal elavurà cun ina procedura participativa cun la populaziun. Ils puncts elavurads èn tranter auter il spazi d'abitar, la convivenza, il svilup da la regiun turistica sur l'entir onn, sco er in'economia diversifitgada. La strategia saja ussa serrada giu en vegnia publitgada bainprest. Davent da quest onn giaja schizunt vid la realisaziun da quella strategia.
La strategia davart il svilup na duai betg daventar in palpiri che finescha en truchet.
Giuvenils ed energia
L'onn passà era Céline Meury stada involvida en var 35 projects. Savens n'è betg ella la purtadra dal projects. Uschia saja grev da respunder tge ch'ella haja cuntanschì en quest onn. In punct culminant per ella saja stà ina iniziativa che giuvenils avevan lantschà. Cun quella vulevan els sa participar pli fitg vid ils process da decisiun en la regiun. Ed era en il rom da la «regiun d'energia» haja Céline Meury dumandà per sustegn tar in project nua ch'ins veglia evaluar il potenzial d'installar fotovoltaica sin fatschadas da bajetgs d'infrastructura.
La sfida en l'avegnir vegnia ad esser la gestiun dal temps cun tut ils differents projects, uschia Céline Meury.
Or da l'archiv:
