L’iniziativa parlamentara “Legalisaziun da la responsabladad da tgira” vul reducir l’administraziun e renconuscher la cumpetenza dal persunal da tgira. Sco Marlis Alig, da l’Associaziun svizra da tgirunzas e tgirunz (SBK) che sustegn questa iniziativa di, èsi uschia ch’il persunal da tgira ha gia ussa da decider davart la tgira da basa. Vul dir, sch’in pazient dovra agid da sa lavar, da sa trair en ubain da tagliar las unglas. Concret èsi dentant uschia ch’i dovria sin il formular anc la suttascripziun dal medi e quai malgrà che quel n’è betg en in lieu per pudair giuditgar sch’i fa basegn u betg, declera Marlis Alig. Da nov duai il persunal da tgira pudair legalisar la lavur da tgira da basa cun l’atgna suttascripziun. «La midada da la lescha che nus giavischain è perquai mo anc ina midada formala», di Marlis Alig.
Sa persvader sez
L’associaziun dal persunal da tgira fa lobi per la midada da la lescha ed envida en l’entira Svizra parlamentaris da guardar sez co la tgira funcziuna. Quai ha era il cusseglier naziunal Martin Candinas fatg tar la Spitex Cadi. El enconuschi la lavur mo da la vart da l’assicuranza da malsauns e perquai saja quai stà fitg interessant. El ha survegnì la confermà ch’ins va la dretga via cun la midada da la lescha. Dentant dovria quai era ina controlla per ch’in na vegnia betg fatg maldiever da las cumpetenzas. Tenor Marlis Alig è la controlla aifer las organisaziun che porschan tgira sco era tar las assicuranzas da malsauns gia fitg buna.
Dapi l’avust è in sboz da la lescha davart assicuranzas da malsauns en consultaziun. Il parlament vegn probabel a decider en il decurs da l’auter onn davart las midadas.