Siglir tar il cuntegn

Header

audio
Sanadad psichica: Tamara Carigiet ha problems psichics – Tge che la pandemia fa cun ella
Or da Actualitad dals 13.11.2020.
laschar ir. Durada: 3 minutas 18 Secundas.
cuntegn

Tamara Carigiet «Dapi l’obligatori da mascras vai mender cun mai»

Tge fa ina pandemia cun persunas che han gia malsognas psichicas? La pertutgada Tamara Carigiet raquinta.

Dapi che l’obligatori da mascras vala bunamain dapertut, vai mender cun la Sursilvana da 25 onns. Sch’ella ha da purtar ina mascra survegn ella savens in'attatga da panica.

Jau na tegn betg ora quai. Jau hai er schon stuì sortir dal tren.
Autur: Tamara Carigiet

La raschun: Tamara Carigiet ha pliras malsognas psichicas. Tranter auter ADHS, il sindrom borderline ed in disturbi da stress posttraumatic.

video
Ina pertutgada declera co il coronavirus influenzescha sia situazinn
Or da Telesguard dals 13.11.2020.
laschar ir. Durada: 3 minutas 31 Secundas.

Egliadas nauschas ed aviras

Tamara Carigiet chapescha ch’ins mira sin ina persuna che na porta betg ina mascra. Las bleras persunas miran fitg nausch u claman perfin aviras, di ella. E damai che l’obligatori vala bunamain dapertut vegn ella trasora confruntada cun quai. Per evitar quellas situaziuns giaja ella strusch pli ord chasa. Uschia giavischa ella simplamain dapli solidaritad dals concarstgauns.

In purtret da Tamara Carigiet.
Legenda: Ins haja schon avunda da cumbatter cun ils agens problems, lura na dovrian ins betg anc da sa giustifitgar mintga di pervi da la mascra, di Tamara Carigiet. RTR

Il quart emprendissadi

La giuvna da Dardin en la Surselva fa uss il quart emprendissadi. Tschels trais ha ella stuì rumper giu pervi da sias malsognas psichicas. Quella giada duai dentant esser auter:

Uss hai jau finalmain miu emprendissadi che jau vi far, che jau fatsch gugent e lura schabegia quai (la pandemia). E lura han ins schon il sentiment: daco? Ma i va vinavant e quai dumagnain nus schon atras.
Autur: Tamara Carigiet

Era homeschooling ha l'entschatta fatg mal il venter a Tamara Carigiet. Uss haja ella dentant chattà in bun ritmus ed emprendì quant impurtant che pausas èn per ella.

Nagina stagiun da skis

Ir cun skis è in grond hobi da Tamara Carigiet. Ma ella di ch'ella na vegnia questa stagiun betg ad ir cun skis. Er en ils territoris da skis vala numnadamain en blers lieus in obligatori da mascras. Ils auters skiunz e skiunzas vegnian tuttina a mirar, sdiavlar e clamar aviras, manegia ella e per quai n'ha ella betg forza.

Jau ditg: Lura mo giai vus. Jau fatsch insatge auter. Jau hai mes animals.
Autur: Tamara Carigiet

Lur chaun e las vatgas da ses bab, ch'è pur, èn fitg impurtants per ella. Ils animals dattan forza a Tamara Carigiet – cunzunt en temps betg uschè simpels.

RTR actualitad 07:00

Artitgels legids il pli savens