Improvisar en la rolla dal film
En las emprovas per in film pon ins repeter fin ch’il reschissur è cuntent; en il teater na pon ins betg far quai. Ins stoppia sa preparar e na possia alura betg pli dir sin tribuna ch'ins veglia repeter, di Hubert Venzin. El è reschissur da la cumedia actuala ed era actur. Ina differenza tranter la rolla en la cumedia ed il film «A la sumbriva dal Tambora» saja ch’els hajan stuì improvisar en la rolla per il film, vul dir: il reschissur haja mo declerà mintgamai la situaziun dad ina scena. Grev saja per ex. stà il mument ch’il reschissur fascheva repeter ina sequenza, ed alura stuevan els ponderar, tge ch’els avevan ditg avant.
Midar dad ina rolla en l'autra va tgunsch
Per Jovita Loretz n'èsi betg stà cumplitgà dad improvisar. Ella fetschia era sezza mintgatant tocs umoristics, e là improviseschia ella era. E gest sch’ins sappia sur da tge ch’ì sa tractia vegnia il text viadora.
En il fim gioga ella la feglia da Hubert respectiv dal Remigi Curschellas; ed ella cumedia è ella la dunna da Hubert respectiv da Ambrosi Decasper. I giaja tgunsch da sa midar dad ina rolla en l’autra, quai saja ì sco sch’ella faschess schon adina questas rollas.
Jovita Loretz di ch’i saja stà ina bella experientscha da giugar ina rolla – sia emprima – en in film. Auter èsi tar Hubert Venzin. El ha gia pudì rimnar experientschas avant onns cun ina pitschna rolla en la seria «la directura» ed in in auter film da Gieri Venzin.
Ina chaussa dubiusa
En la cumedia «Zucher ei tissi» fa Hilda Decasper, la dunna dal pasterner Ambrosi Decasper, durant ina emna ina cura en il hotel Miraval. Perquai ch’ella na turna betg a chasa suenter trais emnas vul l’um savair sch’i sa tracta dad ina chaussa dubiusa, perquai ch'en quest hotel vegnì offert bleras terapias.
RR actualitad 12:00