Teater agricul - Sche la crana da grascha discurra cun il suflafain
En il teater artistic «Ei vegnan a secalmar» surprendan maschinas agriculas las rollas principalas. In toc che duess animar la glieud da contemplar las maschinas ina gia cun auters egls.
L’idea oriunda era da prender las maschinas or da lur context agrar e las plazzar en in auter conturn. E lura laschar raquintar ellas lur istorgia. In’interacziun tranter apparat ed artist, tranter maschina e maschina. In teater da marionettas, nua ch’ins na sa betg adina, tgi che è uss la marionetta.
La preschientscha da las maschinas e lur interacziun duess era sdregliar atgnas regurdanzas ed experientschas, e laschar ponderar aspectaturs ed aspectaturas dals divers temas en connex cun l’agricultura.
Ina dumonda fitg essenziala cun preparar il toc era: tgi decida da tgi? Decidain nus da las maschinas, ni decidan las maschinas, co che nus ans muventain, en tge tact e cun tge ritmus?
Ina suletta preschentaziun
Avrir la boxSerrar la box
Premiera e suletta preschentaziun dal teater «Ei vegnan a secalmar» è sonda ils 26 d'avust a las 20.00 sin il parcadi da las pendicularas Cuort / Sursaissa. Il teater vegn mussà da tutt’aura. En cas da plievgia vegn procurà per suttetg.
