Sa preschentar, star sin tribuna e sa viver en ina rolla ch'è forsa dal tuttafatg cuntraria ad ins sez. Malgrà ch'il hobi da giugar teater n'è betg s’etablì uschè fitg sco il sport, il chant u il sunar in instrument vul l'actur sursilvan David Flepp dar in access als uffants cun manar il curs da teater a Glion, organisà dal Teater Giuven Grischun.
Durant in'emna en las vacanzas d'atun fan ils otg mats e mattas divers exercizis teatrals per lura, la fin da l'emna, pudair preschentar in toc da teater a lur famiglias e parents. Da tge che quel sa tracta, dastgan ils uffants decider sezs:
Quai è er ina experientscha per mai perquai ch'jau sai nua ch'jau part pero betg nua ch'jau arriv. Quai dependa dals uffants.
Er ils uffants ch'èn tranter 9 e 14 onns han plaschair da dastgar sa transformar en ina figura fictiva – tut tenor lur gust:
Jau sun il «Mister Doktor Windelbach» e stoi curar la gimnasta che ha sa fatg mal il pe.
Cun far teater n'emprendian ils uffants betg mo da star davant la glieud e da discurrer cler e chapaivel, els sajan suenter quella emna era pli segirs da sa sezs. Il teater stgaffeschia in plaz nua che bunamain tut saja lubì – uschia era moviments, ramurs e mimicas che n'èn uschiglio betg uschè bainvesids en la societad. En scola u er en famiglia na possian els savens betg sa mussar da quella vart, di David Flepp.
Tut quai che vegn ord lur intern vegn dad insanua e quai duess er avair plaz. Sch'igl è insatge discriminant u betg motivà tematisesch jau cun els daco che quai na va betg.
-
Bild 1 von 4. Amélie Venzin, Anik Hendry, Lena Collenberg e Mika Hendry... Bildquelle: RTR.
-
Bild 2 von 4. ... sco era Seraina Aalders, Freya Tschuor, Noa Christen ed Enea Christen èn ils acturs principals da l'emna da teater a Glion. Bildquelle: RTR.
-
Bild 3 von 4. Avant ch'ir sin tribuna vegn fatg divers exercizis che paran da plaschair als uffants. Bildquelle: RTR.
-
Bild 4 von 4. Sa mover e tuttenina star musch muschet – era quai sto vegnir emprendì. Bildquelle: RTR.