Siglir tar il cuntegn

Header

cuntegn

Teater Sagogn Ina cumedia criminala che duai surtut divertir

L’uniun da teater Sagogn è enconuschenta per sias producziuns sin aut livel. Suenter ina pausa sfurzada da corona è l’uniun puspè sa messa ad exercitar e mussa quest onn il toc «Il gat» scrit dal reschissur Manfred Veraguth. Ina atgnadad da quest toc è che l’actur principal n’è betg sin tribuna, declera Veraguth e manegia il giat. Ma surtut duai il teater plaschair e laschar rir e divertir la glieud, declera il reschissur ch’è gia decennis engaschà per il teater popular en Surselva e spezialmain a Sagogn.

audio
Teater «Il gat» a Sagogn
ord Actualitad dals 15.10.2022. Bild: RTR
laschar ir. Durada: 4 minutas 8 Secundas.

Puspè cumenzar suenter la pandemia

Sche la pandemia avessi anc durà plirs onns, alura fissi stà pli stentus da puspè cumenzar cun far teater, din las acturas ed ils acturs. Gia uss saja stà quasi sco l’entschatta, surtut l’emprender ordadora il text. Ma surtut las acturas ed ils acturs sajan da la bella entschatta stads fitg motivads e quai fetschia pli simpel la lavur dal reschissur.

La gruppa da teater Sagogn
Legenda: La gruppa da teater Sagogn: Davon da sanester, Guido Tschuor che gioga il Stefan, Anna Maria Welter, che gioaga la Annamengia e Patricia Tönz che gioga la Sandra. Davos da sanester: Georgina Janki, che gioga la Maia Madlaina, Curdin Venzin, che gioga il Christian e Roman Niederberger, ella rolla dal Giacumin Curau. RTR, Gionduri Maissen

In enguladitsch che va en las chautschas

Il toc tracta d’in banchier ch’ha pers sia plazza e che dovra uss daners. Cun ses ami fa el in plan d’engular da l’onda pli bainstanta ina da las chadainas preziusas. Ma betg tut va sco planisà e la finala vegn la polizia da sclerir il malfatg. La cumedia criminala saja concepida uschia ch’ins enconuschia quasi da l’entschatta il delict ma ch’ins sappia tuttina betg co la fin vegn ad esser, ina cumedia betg memia tuppa, di Manfred Veraguth. E l’avantatg da scriver sez il toc saja ch’el possia far midadas senza stuair dumandar chasas edituras ni scripturs, quai fetschia la lavur pli simpla a tuts.

La premiera è sonda ils 15 d’october. Alura vegn il toc anc mussà ulteriuras quatter giadas, mintgamai en la halla da la chasa da scola a Sagogn. La derniera è alura ils 22 d’october.

RTR actualitad 07:00

Artitgels legids il pli savens

Scrollar a sanestra Scrollar a dretga