Siglir tar il cuntegn

Header

Lavur dal project guaud da muntogna
Legenda: Impressiun da la lavur dal project guaud da muntogna l'onn passà visavi Curaglia. FMR / Hans Huonder
cuntegn

Tema «luf» Collavuraziun cun il Project guaud da muntogna vegn interruta

Suenter che la vischnanca da Lumnezia ha interrut la collavuraziun cun il Project guaud da muntogna fan ils purs da Medel il medem. La gruppa dal project ch'è engaschada en Val Medel ha stuì pachetar las cofras.

Il motiv per questa decisiun è la votaziun davart la lescha da chatscha federala. «Igl è inacceptabel co Martin Kreiliger dal project guaud da muntogna batta cunter questa lescha. El cuntrafetschia als interess da l'agricultura e da blera glieud en la muntogna«, di Giusep Flepp da Curaglia.

Interrut las lavurs

Ils collavuraturs dal project èn stads engaschads ils ultims dis en in'acla da Giusep Flepp a Darein visavi Curaglia. Là avevan els l'incarica da deliberar la pastgira da chaglias per che la cultivaziun, respectivamain la pasculaziun saja garantida en l'avegnir. Flepp ch'ha dà a fittanza ses manaschi n'era betg orientà: «Il migiur da mes manaschi ha surdà questa lavur al Project guaud da muntogna. Ad el na fatsch'jau betg renfatschas.» La decisiun d'interrumper la collavuraziun attribuescha Giusep Flepp buc a la lavur ch'il project presta

I va sulettamain cunter la tenuta da Martin Kreiliger. Quella è per nus inacceptabla. Sche nus na reagin betg, lu na sai betg tgi uschiglio.
Autur: Giusep FleppPur en Val Medel

Sin dumonda da la FMR ha il president communal da Medel, Rico Tuor, ditg ch'el saja orientà dals schabetgs. El accentuescha che la vischnanca lavuria gia dapi 25 onns cun il Project guaud da muntogna e che la collavuraziun saja fitg buna.

Il manader da fatschenta dal Project guaud da muntogna, Martin Kreiliger, n'ha betg vulì prender posiziun sin dumonda. El veglia tschertgar il contact cun la glieud pertutgada. Martin Kreiliger è s'exponì differentas giadas publicamain cunter la revisiun da la lescha da chatscha. Tranter auter da curt a Glion en il rom d'ina orientaziun e discussiun organisada da l'Uniun purila grischuna.

Tegnair liber pastgiras

Sco Rico Tuor di, sajan ins sa cunvegnì cun il project sin ina collavuraziun a lunga vista pertutgant la lavur vid pastgiras.

Per tegnair liber las pastgiras da chaglioms ed uschia pussibilitar ina cultivaziun en l'avegnir, survegnan ils purs contribuziuns. Blers n'han dentant betg la peda da far questas lavurs ed uschia l'idea da collavurar cun il project guaud da muntogna, sa chapescha per indemnisaziuns.
Autur: Rico Tuorpresident communal

Surfatschas agriculas che na vegnan betg cultivadas ni pasculadas creschan mintg'onn in zic pli fitg. En il territori visavi Curaglia èsi per exempel vegnì lavurà l'onn passà durant quatter emnas. En gruppas da mintgamai diesch persunas per emna èsi vegnì taglià or chaglias en lieus che vegnivan pasculads ni schizunt cultivads pli baud. La finamira da questa lavur n'è betg simplamain da runcar tut ch'è denturn. En egl è en quest connex er la biodiversitad. La lavur succedida e ch'avess giu da vegnir fatga era l'avegnir, tranter auter sut Vergera, va en la categoria da la tgira da la cuntrada cultivada, respectivamain la tgira dal ur dal guaud.

Per tadlar curt e concis:

RTR novitads 06:00

Artitgels legids il pli savens

Scrollar a sanestra Scrollar a dretga