Temperaturas fraidas en ils lais augmentan la ristga d'accidents

Suenter l'accident mortal da la fin d'emna en il Lai da Cauma avertescha la societad Svizra da salvament avertescha cunzunt da las temperaturas fraidas che regian per il mument anc en ils lais da muntogna. Quellas vegnan savens sutvalitadas.

Il Lai da Cauma Bild in Lightbox öffnen.

Legenda da maletgs: vv Polizia chantunala dal Grischun

Il Lai da Cauma ha per il mument mo radund 17 grads. Tenor Philipp Binaghi da la Societad svizra da salvament saja bain pussaivel che quai è stà in dals motivs per l’accident da la fin d’emna en il lai.

Privel d'aua fraida

Il corp dovri numnadamain bler energia en aua fraida, ultra da quai sappia dar gramflis u schizunt in schoc. Tar in schoc sa tiran las avainas ensemen ed ins po perder la schientscha u schizunt survegnir in’attatga dal cor. Sche la differenza da temperatura tranter l’aria e l’aua è gronda fetschia quai perquai senn da mo ir plaunsieu en l’aua e da betg siglir.

Dar adatg cun uffants

Cunzunt tar uffants pitschens saja adina da star datiers per ch’ins possia tschappar l’uffant. Mo 20 secundas e fitg pauca aua tanschan gia per ch’in uffant pitschen po najar, uschia Philipp Binaghi vinavant.

Sa tegnair vid reglas dad SSS

La societad Svizra da salvament avertescha er dad ir en l’aua suenter avair consumà alcohol u drogas. Plinavant na duess ins er betg siglir en auas nunenconuschentas u turblas. Er cun magun vid u plain na duess ins betg ir a nudar.

Accident mortal en in Lai da Cauma

A Flem è najà in um en il Lai la Cauma. L'um da 25 onns dal chantun Turitg ha vulì nudar ensemen cun in collega da la riva sin l'insla ch'è circa 50 meters davent. Curt suenter la riva è l'um vegnì en difficultads.

Passants èn vegnids attents sin ils cloms d'agid dal collega. L'um ch'era entant sfundrà ha pudì vegnir salvà ord ina profunditad da dus meters. El è vegnì reanimà. En in stan critic ha la Rega sgulà l'um en l'ospital chantunal nua ch'el è mort pli tard.

RR actualitad 17:00