Gion e Rosmarie Christoffel han avant 25 onns cumenzà cun in e pli tard cun dus autocars en l'atgna fatschenta «Christoffel Reisen». Avant paucs onns ha Gion Christoffel surlaschà il viagiar a sia dunna e preferì ina plazza stabla tar in impressari d'autos da vitgira.
La primavaira passada cun il lockdown èsi lura sta cler che viadis cun autocars na vegnia per in temp betg pli a dar.
Rosmarie Christoffel ha reagì immediat e deponì ils numers da l'auto. Davent da l'entschatta haja ella vesì che spargnar stoppia esser la devisa per betg perder tut quai ch'els han bajegià si ils davos 25 onns.
La plazza sco chauffeura che jau hai chattà ad Arosa è sco in da sis en il lotto per mai.
Per la dunna da 57 onns ha la tschertga d'ina plazza cumenzà. Sco ella raquinta, saja stà per casualitad ch'ella haja chattà la plazza sco chauffeura tar il bus da remplazzament d'Arosa, che cursescha da Litzirüti ad Arosa. Ina situaziun famigliara – ella ad Arosa ed el a Riein – che Gion e Rosmarie Chistoffel han pir stuì s’endisar vidlonder. Plain speranza guarda Rosmarie en l'avegnir e spera che ses autocar vegnia puspè ord garascha.
