Ursicin Gion Gieli Derungs era oriund da Vella. Suenter il gimnasi a Mustér ha el studegià filosofia e teologia a Roma, Tübingen e Turitg e finì cun la promoziun. Gia avant sia scolaziun universitara era Derungs entrà en claustra a Mustér. Suenter 20 onns en la claustra è el dentant puspè extrà ed el ha annullà sia empermischun.
Pli tard era el magister en il gimnasi Svizzer a Milaun. El ha maridà sia dunna Maria Cristina che saja stada ina partenaria impurtanta per dumondas litteralas, teologicas e filosoficas.
Autur critic envers la baselgia
Ursicin Gion Gieli Derungs è sa fatg in num sco autur e redactur. Uschia ha el scrit tant en prosa, sco era ovras dramaticas. Plinavant ha el per exempel translatà ovras da William Shakespeare u Max Frisch per rumantsch. Derungs ha er scrit artitgels e columnas per gasettas rumantschas, per exempel per la «Quotidiana».
En sias publicaziuns è Derungs er s'exprimì a moda critica envers las structuras da la baselgia catolica. Quai saja vegnì resentì sco provocaziun en circuls conservativs da la Surselva.
Or da l'archiv