Siglir tar il cuntegn

Header

La halla polivalenta en construcziun gest sper il Rain da Val.
Legenda: La halla nova cumplettescha la scola. RTR, Linus Livers
cuntegn

Terma Val Remo Stoffel ha pajà ses debits

En total ha Stoffel contribuì 4,5 milliuns francs per la construcziun da la halla polivalenta a Val.

  • Remo Stoffel ha pajà enavos a la vischnanca da Val ses debits da 4,5 milliuns francs.
  • Ils daners tutgan tar in'empermischun che Stoffel aveva fatg envers la giuventegna da Val da sa participar vid la construcziun dad ina nova halla polivalenta. Quai per pudair cumprar la Therme.
  • Er la davosa transcha da quests daners sajan uss vegnids pajads enavos ha ditg il president da la vischnanca Stefan Schmid.

Il 2012 ha Remo Stoffel pudì cumprar la terma a Val per 7'777'777.-. Quai sut las cundiziuns che Stoffel sa participeschia cun 6 milliuns francs vid la nova halla polivalenta. Questa halla era planisada gist sper l'hotel da la terma.

Midada da planisaziun

Quests plans èn dentant sa midads e la halla polivalenta vegn planisada sulettamain entras la vischnanca sper la chasa da scola existenta. Quai senza la participaziun da la 7132 SA sut Stoffel che desista sin las localitads da la halla. En il medem mument sto Stoffel be pli sa participar cun 4,5 enstagl da 6 milliuns francs per la halla.

Resumà ha Remo Stoffel pajà en total per l'hotel Therme 12,3 milliuns francs. La halla planisada da la vischnanca custa 14,5 milliuns, e vegn inaugurada l’auter onn.

RR novitads 12:00