La famiglia ha survivì la catastrofa, quai saja almain il sulet positiv, di Mustafa Ayhan. El maina dapi passa 15 onns il Royal kebab a Mustér. Ma ses parents hajan pers tut sco las autras famiglias. Era sche las chasas stettian anc, viver en ellas possian ins betg pli, i na dettia nagina electricitad e nagin gas per stgaudar. Era na sappian ins betg sche quai dettia anc ulteriurs terratrembels, ils experts quintan anc cun moviments da la terra. Ayhan persequitescha intensiv las novitads sur las medias socialas sur ses telefonin.
Sia sora ha per exempel stuì durmir ils emprims dis cun ses uffants pitschens en l’auto, uss hajan els survegnì dimora en ina halla da gimnastica. Ma el quinta che la situaziun sa pegiureschia cun mancanza d’aua e da mangiativas ed era las maschinas grondas per rumir las destrucziuns manchian simplamain.
Gidar uss durant l'enviern
Il pli gugent prendess el sia sora ed ils uffants en Svizra, almain durant l’enviern. En in pèr mais saja pussaivel ch'ins haja lura gia rumì ils pli gronds donns e l’infrastructura la pli impurtanta saja puspè en funcziun. El quinta che las lavurs da reconstrucziun vegnian a durar plirs onns, ma el speria ch’ins vegnia ad emprender or da la catastrofa, betg sco suenter ils terratrembels d’avant 20 onns.
Ma els vegnian a gidar cun tut quai ch’els hajan per sustegnair las persunas ch’han pers tut, era sch’il center da lur vita e da la famiglia Ayhan saja uss a Mustér.
