Siglir tar il cuntegn

Header

video
Naginas fullas en il territori da skis da Flem Laax
Or da Telesguard dals 28.12.2020.
laschar ir. Durada: 2 minutas 49 Secundas.
cuntegn

Territori da skis a Laax En colonna cun 1,5 meters distanza

Il Grischun è in dals paucs chantuns nua ch'ils territoris da skis restan averts. Da quella purschida vegn fatg diever fermamain. Sur ils dis da festa èn uschia blers turists d'auters chantuns e pajais vegnids a Laax per giudair la libertad sin las pistas. Mo co vesi ora cun il concept da segirezza?

Durant ils dis da festa han blers chattà la via en il territori da skis a Flem – Laax – Falera. Per exempel la sonda ils 26 da december è l’entir contingent da cartas dal di stà vendì ora. Tenor l’app «Inside Laax» sajan quai di pli che 8’000 persunas stads sin las pistas dal territori da skis. Per cumparegliar: L'onn passà hai gì tranter Nadal e Bumaun dis cun enturn 18'000 persunas en il territori.

audio
Quant bain ch'ils territoris vegnan da realisar las mesiras da corona
ord RTR Audio dals 27.12.2020.
laschar ir. Durada: 5 minutas 10 Secundas.

Take-away sin ils pes

Las ustarias che dattan normalmain puspè chaud suenter in avantmezdi en la naiv n’èn betg avertas. Persuenter datti intgins indriz da take-away nua ch’ins po cumprar fast-food sco chicken nuggets, pizza u pasta. Da magliar èsi dentant sin ils pes. Ils plazs da seser èn tatgads giu uschia ch’igl è da magliar en il liber, en pe u giun plaun en la naiv.

take-away.
Legenda: In dals take-away's sin il Crap Sogn Gion. Blers sa decidan dentant da prender cun in paunet da chasa. RTR, Lukas Quinter.

Tut vegn surveglià

En ils hotspots nua che blera glieud sa rimna normalmain – sco per exempel a Laax Murschetg u era sin il Crap Sogn Gion – èsi da chattar persunal da fatschentas da segirezza che guardan minuziusamain che la glieud porta a tut il temp la mascra da protecziun. Tenor ina persuna dal persunal da segirezza sa tegnia la glieud fitg bain vid l’obligatori da mascras che vala sin l’entir areal da l’Arena Alva.

gondla, fullanà cun glieud.
Legenda: La vista en la gondla sin il Crap Sogn Gion. RTR, Lukas Quinter.

Era datti pliras persunas che guardan che las distanzas en las colonnas per la sutgera vegnan resguardadas. En la gondla gronda sin il Crap Sogn Gion stat medemamain ina persuna che controllescha che tuts portan ina mascra. Malgrà che mo 2/3 dastgan ir en la gondla direcziun Crap Sogn Gion, paria tuttina che la distanza dad 1,5 meters n’è surtut la damaun betg realisabla.

RTR actualitad

Artitgels legids il pli savens