Dapi ils 31 da december èn las mesiras da segirtad pervi da corona puspè vegnidas schluccadas en ils territoris da skis. Ils restaurants pon avrir lur terrassas.
Ils giasts giaudan da pudair seser. Quai mussa l’exempel en il territori da skis da Mustér, sin la terrassa dal restaurant Caischavedra.
Igl è empernaivel ch’ins dastga puspè seser.
Mesiras per las maisas
Era la scheffa dal restaurant Caischavedra, Evelina Venzin, senta, che la glieud giauda e stat uss pli ditg. Avant stuevan els mangiar en pe. Normalmain han circa 150 persunas plaz sin terrassa. Uss – cun las mesiras da segirtad pervia da corona – mo anc la mesadad.
Nus avain stuì metter las maisas in meter e mez ina ord l’autra, e far maisas da quatter.
Sche pli bleras persunas èn vid ina maisa, sto ina vitrina esser tranter en. Mo famiglias dastgan seser ensemen pli blers che quatter persunas. Ma era sch’il restaurant è serrà, na munta quai betg ch’i dat pli pauc lavur, sco Evelina Venzin declera.
Per nus datti dapli da preparar e nus stuain pachetar tut las tschaveras.
In'ulteriura consequenza dal pachetar cun tagliers da chartun e cups da plastic è – ch’i dat pli bler rument.
Controllas
E la finala stoppian els era far controllas, sco il directur da las Pendicularas da Mustér Stefan Arnold di:
99% da la glieud è dentant sezza fitg precauta.
Sperdita
Dentant era sche las mesiras da segirtad èn vegnidas schluccadas, na po il directur betg preschentar fin uss in bun quint per restaurants u bars a Caischavedra, Gendusas, Lai alv e Cuolm da Vi. I dettia ina gronda differenza tranter il december 2019 ed il december 2020.
Tar las ustarias da culm è la situaziun fitg pitra, là avain nus ina sperdita da la svieuta dad 80%.
Uss spera Stefan Arnold ch’il favrer, il temp da vacanzas – possia anc cumpensar in pau questa sperdita.