Siglir tar il cuntegn

Header

cuntegn

Territori da skis Sedrun Ina terrassa, ina dispita ed in filmin

En il territori da skis da Sedrun tranter Dieni e Milez sa chatta la bar d'après-ski «La Schliusa». Sonda han ils gestiunaris da questa bar publitgà in filmin en las medias socialas, per far attent ad in conflict tranter vischins. Pervia da questa dispita na po «La Schliusa» betg avrir la terrassa.

La sonda passada han ils gestiunaris da la bar «La Schliusa», Maurin e Sandro Cavegn, publitgà in filmin en las medias socialas e sin la pagina online. Cun quai filmin vulan els far attent sin in conflict cun lur vischin che cuzza gia intgins onns.

Il vischin ha quest onn numnadamain fatg protesta encunter la dumonda da bajegiar temporara per la terrassa. La bar dad après-ski «La Schliusa» sa chatta tranter Dieni e Milez a Planatsch. Perquai che la nova bar, averta avant trais onns, sa chatta ordaifer da la zona da bajegiar ston ils gestiunaris mintg'onn dumandar danovamain per ina lubientscha da bajegiar temporara per la construcziun da la terrassa ch'ha plaz per 130 persunas. Damai ch'il vischin ha fatg protesta encunter la lubientscha da bajegiar, n'è quai betg pussaivel il mument – ed ils osps da la bar ston prender plaz mo sin ballas da strom e bancs provisorics.

Bar «La Schliusa» im Skigebiet Sedrun. Wegen eines Rekurses durfte die Terrasse nicht aufgebaut werden.
Legenda: «La Schliusa» cun la terrassa. mess a disposiziun

Punct culminant da plirs conflicts

«La Schliusa» ha avert sias portas l'onn 2020. Mainafatschenta da la bar è il Tuatschin Maurin Cavegn ensemen cun ses savrin Sandro Cavegn.

Dapi l'avertura hajan els adina puspè conflicts cun lur vischin che posseda medemamain ina purschida turistica a Planatsch. «Nus avain a l'entschatta empruvà da lavurar ensemen cun il vischin», ha Maurin Cavegn declerà a la FMR, «dentant, cura che nus avain tschertgà il discurs, è quai adina mo stà negativ.» Tut las stentas da collavurar sajan vegnidas refusadas.

Maurin Cavegn numna in exempel: Cunquai che «La Schliusa» è atgnamain ina stalla, n'è la bar betg colliada cun las lingias d'aua. Perquai hajan els dumandà il vischin per aua per ch'els possian bajegiar installaziuns sanitaras. Els n'hajan betg survegnì la lubientscha ed hajan stuì installar tualettas da toi-toi. Quellas tualettas en il liber sajan alura danovamain fruntadas sin opposiziun.

Tge è il motiv

Ils motivs per il recurs n'èn fin uss betg clers a Maurin e Sandro Cavegn. Envers la FMR n'ha il vischin e recurrent explicitamain betg vulì declerar tge che disturbia el exact vi da la terrassa – la canera, la truscha, la vesta u insatge auter. Ils gestiunaris da la bar «La Schliusa» speculeschan ch'i sa tractia da motivs persunals.

«Nus avain pudì tegnair ora quai ditg, cunquai che nus avain tuttina adina pudì far nossa chaussa. Ma ussa èsi sa chargià si uschè fitg, che nus stuain schizunt desister quest onn da la terrassa», declera Maurin Cavegn. Fin uss hajan els adina chattà alternativas per las sfidas. La perdita da la terrassa procuria per in grond deficit, cunquai che lezza porschia plaz per 130 osps, l'intern da la stalla dentant sulet a 30 persunas.

I po cuzzar

Ils emprims onns d'existenza da la bar survegniva «La Schliusa» mintgamai ina lubientscha da bajegiar temporara da la vischnanca Tujetsch, sco quai che lezza conferma a scrit a la FMR. La terrassa stueva adina vegnir bajegiada giu a la fin da la stagiun d'enviern. Ussa ch'igl ha dà ina protesta, n'ha la vischnanca betg pudì conceder la lubientscha per la stagiun d'enviern 2023/24. Ella na possia era betg intermediar en chaussa, scriva la vischnanca da Tujetsch a la FMR. Tut dependia da la dumonda da bajegiar «BAB» (bajetgs ordaifer la zona da bajegiar) e dal parairi correspundent da l'Uffizi per il svilup dal territori dal Grischun – ed alura era da la decisiun da la Dretgira administrativa en connex cun quai cas. Quai po pia cuzzar in mument.

Ina lubientscha «definitiva» en connex cun la terrassa pudess pir vegnir concedida sin basa dad «in concept sur l'entir territori da skis», sco la vischnanca declera a la FMR. E quai concept saja il mument pir en elavuraziun.

In filmin animà

Pervia da questa situaziun delicata ed intscherta per lur fatschenta en vista a la nova stagiun – lantschada l'emna passada – han ils gestiunaris da la bar «La Schliusa» decis da far public il conflict cun lur filmin ch'è da chattar tranter auter sin las medias socialas e sin la pagina online da la bar. Cun questa acziun hajan els vulì lantschar la discussiun davart la problematica per glieud giuvna en la regiun da realisar in project.

Il filmin animà – malegià cun figurettas simplas – declera in conflict or da vista subjectiva da «La Schliusa», cun crititgar explicitamain l'agir dal vischin. E quest'acziun publica ha para gì success tenor ils gestiunaris. «Nus avain gì bleras reacziuns positivas sin noss filmin», di Maurin Cavegn. Ussa speran els sin ina schliaziun paschaivla, per ch'els possian cuntinuar cun lur purschida en la bar «La Schliusa» – cun ina terrassa en la glisch ed en la pasch tuatschina.

Artitgels legids il pli savens