Schon daditg sajan ils scolars e las scolaras da la terza superiura da Mustér sa legrads da finalmain pudair ir en sortida ed ad open airs. Tant pli gronda è la trumpada.
L’emprima giada che jau dastgass ir sin ina festa sai jau uss emblidar.
Almain la festa cun l’entira classa, venderdi saira, possian els far, di Remy Manetsch. Persuenter croda la messa da la finiziun da scola – e quella manchia, di Mila Demont.
Senza la messa èsi sco ina normala fin da l’onn e betg in sentiment da la finiziun da scola.
Vinavant è er il viadi da classa a Locarno dà en l’aua.
Lavurar sur sa sez
Homeschooling, pia scola da chasa anora, saja l’entschatta schon stà in zichel curius ed ins haja stuì sa disar, di Remy Manetsch. Ma la finala saja quai gartegià fitg bain. Mila Demont agiunta ch’els hajan uschia era stuì lavurar sur sa sez, tge ch'omadus han chattà positiv e sco buna preparaziun per l’emprendissadi.
E schegea ch’els hajan s’imaginà lur finiziun da scola e las sortidas che vegnan in zichel auter, sa legran els uss en mintga cas sin ina nova etappa en lur vita e bandunan la scola cun «in bun sentiment».