Siglir tar il cuntegn
cuntegn

Surselva Tes implant fotovoltaic, tia energia

Tgi che ha ina chasa po era producir l'atgna energia. Quai è l'idea da Hello Future. Davos Hello Future stan la Rhiienergie e l'ovra electrica da Lumbrein.

In cundrez fotovoltaic sin in tetg plat
Legenda: Il tetg da la chasa da Stefan Herger a Panaduz producescha energia per ses agen diever. Riienergie

Fin ussa vegniva l'energia solara producida sin tetg furnida en la rait. Dapi in onn dastga la producenta d’energia solara era gest duvrar questa energia per ses agen perchasa.

La KEF (indemnisaziun per cuvrir ils custs da la furniziun d'electricitad) ha lubì quai, ed il medem mument midà il sistem da sustegniment per implants fotovoltaics pitschens. Per tals cundriz datti be pli ina contribuziun fixa e nagina garanzia per il pretsch da vendita da l'energia.

Adina dapli implants solars

Cun questa midada daventan ils implants pitschens attractivs per mintga perchasa, manegia Venanzi Pfister da la Rhiienergie. Fin ussa ha la Rhiienrgie installà 12 da quests cundriz solars nua ch'il possessur po duvrar sez sia atgna energia.

La finamira è da pudair installar var 50 da quels cundrizs per onn. Sco quai che Venanzi Pfister di, duai la collavuraziun cun las ovras electricas da Lumbrein gidar da cuntanscher quella finamira.

Stefan Herger il possesur da la chasa cun in cundrez fotovoltaic e Venanzi Pfister da la Riienergie.
Legenda: Stefan Herger il possesur da la chasa cun in cundriz fotovoltaic e Venanzi Pfister (giacca blaua) da la Rhiienergie. RTR, L. Livers

Exempel a Panaduz

Nus avain visità Stefan Herger da Panaduz ch'ha installà sin tetg da sia chasa in tal implant fotovoltaic. El dovra var 35 % da l’energia ch’el producescha sin tetg gest en ses agen perchasa.

Quai pudess ins dentant anc optimar cun in segund pass da svilup, numnadamain cun installar battarias. Uschia pudess la chasa da Stefan Herger la finala duvrar tut l’energia ch’el producescha per ses agen perchasa.

Ils implants fotovoltaics che la Rhiienergie e l'Ovra electrica da Lumbrein monteschan pon ins affittar cun ina sort leasing e suenter 15 onns s’audan els a la possessura da la chasa. I dat dentant era la pussaivladad da cumprar l'indriz. L’energia betg duvrada retira l’ovra electrica e l’energia che la clienta dovra sez è ses profit.

Uschia simpel è quest model che duai sustegnair la midada d’energia 2050 sco la Confederaziun ha inizià ella.