Siglir tar il cuntegn

Header

cuntegn

Thomas Castelberg «Quai dovra concentraziun, experientscha ed in bun sentiment»

Far ina buna loipa n'è betg simpel. Da far ina cun mo 20 centimeters naiv è dentant ina pulit gronda sfida. Per Thomas Castelberg, che fa la loipa tranter Trun e Mustér vul quai dir: avair in bun maun cun bler sentiment per la maschina da far pista.

Cunzunt ils emprims meters è il sentiment da l'um da 58 onns dumandà. Lura èsi numnadamain da drizzar ils parameters da la maschina a las cundiziuns dadorvart. Vul dir: quant profund duess la fresa da naiv tagliar en, tge spertadad è adattada, ed era l'anghel dal tagl saja decisiv. Ma i n'è natiralmain betg fatg cun drizzar tut ina giada. Cun ils massa nuvs, la roda da manar che sumeglia ad ina d'in aviun sco er cun il joystick fa el adina puspè pitschnas correcturas.

In factur impurtant è, tenor l'um che fa gia 25 onns la loipa sisum la Surselva, la temperatura. Sch'i saja fraid durant il di e la notg (sut nulla grads), lura giaja quai il meglier. Critic vegnia, cura ch'i fetschia +4 u 5 grads durant il di, e sch'i schelia la notg. Lura dettia plitost glatsch che naiv.

Ina lavur da 100%

Actualmain na lubescha la situaziun da naiv betg da preparar l'entira loipa tranter Trun e Mustér. Uschia èn era las rundas da Thomas Castelberg pli curtas. Ma sch'el prepara l'entira loipa, ch'è cun passa 30 kilometers la pli lunga da la Surselva, ed anc la pista dal pitschen runal da skis, lura è el tranter set ed otg uras en viadi. Quai per part mintga di ed il bler tranter las 17:00 la saira e 01:00 la notg. Il maschinist lavura pia la saira u la notg e ha lura liber durant il di.

Muments da bellezza e da quietezza

Tar tut la concentraziun ed ils detagls, ch'il bab da famiglia ha da tegnair en egl en la maschina, datti era muments pli ruassaivels u spezialmain bels, per part schizunt in pau meditativs, cun la ramur monotona da la maschina e la naiv da la loipa che traglischa en la glisch dals reflecturs. Quai sajan lura quels muments, nua ch'el possia metter giu ils quitads, sa quietar e sa revegnir.

Savens entaupa Thomas Castelberg lieurs, vulps u entiras rotschas da tschiervs. Quels giajan magari lungs tocs davant la maschina e bandunian pir lura la loipa. Uschia saja mintgatant schizunt da sa fermar e spetgar. Ils animals na sa laschian betg disturbar.

Er a Sagogn vegn lavurà cun pauca naiv

Fertant ch'igl ha sisum la Surselva almain anc ina cozza che lubescha da far loipa, èn ils da Sagogn dependents dal tuttafatg da naiv artifiziala. La finamira è da realisar la loipa uschia ch'i po dar ina cursa la fin d'emna. Memia bler sulegl u er temperaturas autas èn però er in privel per la loipa cun naiv artifiziala.

RTR actualitad 07:00

Artitgels legids il pli savens

Ir a sanester Ir a dretg