Siglir tar il cuntegn

Header

audio
Bunura: Ir l'enviern cun velo – tips dal mecanist
Or da Actualitad dals 29.11.2019.
laschar ir. Durada: 02:44 minutas.
cuntegn

Tips d'in mecanist da velo Co mantegnair il velo durant l’enviern?

Pirmin Capaul da Lumbrein è mecanist da velo tar Scott Sports SA ed ha tips e trics per Vus!

Il pli impurtant saja da lavar il velo mintga dus dis per vegnir davent cun il sal vid il velo ed unscher la chadaina. Il sal ch’è sin via donnegia il velo.

Tge ch’è era fitg impurtant tar E-Bikes è da prender a chaud la battaria dal velo. Sche la battaria ha fraid lura stgargia ella, vegn donnegiada ed ins na po betg pli duvrar l’entira capacitad da la battaria e sto tut tenor cumprar ina nova.

Metter sut tetg

Pirmin Capaul cusseglia era da metter il velo il meglier a chaud u almain sut tetg, sch’ins na va betg cun el durant l’enviern.

Simplamain laschar il velo giuadora sut la naiv, quai faschess jau mai!
Autur: Pirmin Capaulmecanist da velo

Metter ina blatga sur il velo è era meglier ch'insumma nagut, ma tenor il giuven da 23 onns n’è quai era betg optimal.

E-Bike e la battaria

Igl è impurtant da prender a chaud la battaria. Ma era da mirar ch’ella è adina chargiada sin 80%, era sch’ins na va betg cun velo durant l’enviern. Sche la battaria n’è betg chargiada fa quai era donn ad ella e sia qualitad vegn mendra. Quai munta ch’ella n’ha lura betg pli l’entira capacitad.

Dar lavur als mecanists durant l’enviern

Ils mecanists da velos sajan leds sche la clientella che na va betg cun velo durant l’enviern, portia ils velos durant l’enviern per laschar far il service e betg pir la primavaira.

Lura vegnan ils ciclists l’emprim bel di ed avessan il pli gugent il service schon sin ier.
Autur: Pirmin Capaulmecanist da velo

Uschia nagin che ha in stress ed ils velos èn gia pronts cura ch'ils emprims dis pli chauds èn arrivads la primavaira.

RTR actualitad 08:00