Tranter ils giasts è era la cussegliera guvernativa dal Grischun Barbara Janom Steiner stada. Ella è stada chapitani en l'armada svizra e di ch'ella haja anc la pistola a chasa. Ella è commembra da l’associaziun da tir da Cuira ed ella haja adina gì plaschair dal tir, perquai che quai saja sport e cumpagnia. Ma i saja er ina fitg bella tradiziun ed ina demonstraziun da tschertas valurs che sajan impurtantas per noss stadi, manegia la cussegliera guvernativa.
In pèr famiglias a Trun sajan fascinadas da quest sport
Ina dunna ch'è betg commembra dad in'uniun da tir è la deputada en il Cussegl grond Gabriela Tomaschett da Trun. Ella n'haja betg gì contact u chaschun dad ir a sajettar ed ella n'haja betg fatg militar. Il tir haja in aspect militar perquai ch'ins stoppia ir a sajettar il tir obligatoric, da l'autra vart sajan in pèr famiglias a Trun fascinadas dal sajettar sco sport.
Trenament per la schuldada
Era il divisiunari Lucas Caduff ch'è oriund da Schlans di, ch'il sport haja ina rolla impurtanta tar ils tiradurs. Mo il tir obligatoric e champester gidia a trenar la schuldada svizra per ch'ella saja segira cun l'arma. Quai surtut en ils cas ch'ins stuess forsa duvrar quella in di per defender la Svizra e sias valurs.
Gronda tradiziun en Svizra
Avant plirs tschientaners, en il temp medieval, aveva il sajettar plitost anc l’aspect dal sa defender, per ex. cun las guardias civilas en las citads, sco il president dal comité d’organisaziun da la Festa da tir chantunala Marcus Caduff ha raquintà en ses pled d’avertura. E gia en il temp medieval deva quai corporaziuns da tiradurs. E dapi 1896 è il tir ina disciplina olimpica.
Era en Svizra ha il tir ina gronda tradiziun. L’uniun svizra da tiradurs è vegnida fundada il 1824. Dapi il 1874 datti il tir obligatoric. Al tir champester prendan mintgamai passa 100’000 persunas part.
RR actualitad 07:00