Swiss Shooting – la Federaziun da tir svizra – ha selecziunà Alicia Beer per ils Campiunadis da tir d'Europa. Quels han lieu dals 30 d'avrigl enfin als 7 da matg 2026 ad Osijek en Croazia. Là vegn la Tuatschina a concurrer cun las meglieras junioras dal continent. Sia finamira: Cuntanscher il final en la concurrenza da trais posiziuns cun il caliber pign sin la distanza da 50 meters.
La carriera da tir d'Alicia Beer (18) da Rueras para dad ir mo en ina direcziun – numnadamain ensi. Dapi ch'ella ha cumenzà cun il tir sco giuvna en il stan da tir da la Societad da tir Voluntaria Trun marscha ella dad in success a l'auter. Ella è gia campiunessa svizra da las junioras sin la distanza da 10 meters e l'onn passà è ella vegnida distinguida sco meglra juniora da la Federaziun da tir grischuna.
In record a Pilsen
Ma Alicia Beer ha era gia mussà excellentas prestaziuns sin plaun internaziunal. Uschia il favrer 2025 ad ina concurrenza da las tiraduras sut 21 onns a Pilsen en la Tschechia.
En il match da trais posiziuns cun 60 sajets cun il caliber pign sin la distanza da 50 meters ha ella cuntanschì 592 puncts ed è uschia daventada secunda da las junioras. Quels 592 puncts èn era stads ses record persunal. Quels dis è suandà in ulteriur punct culminant en giuvna carriera d'Alicia Beer. Ella è vegnida selecziunada da Swiss Shooting – la Federaziun da tir svizra – per ils Campiunadis d'Europa da la fin d'avrigl ed entschatta matg 2026 ad Osijek en Croazia. Ella concurrenzescha là en la categoria da las junioras sut 21 onns.
En ina fitg buna fasa
En vista als Campiunadis d'Europa di Alicia Beer: «Jau sun il mument en ina fitg buna fasa. Dapi ch'jau treneschel en il center da prestaziun a Bienna hai jau fatg in bun svilup. Ils trenaments èn pli intensivs e pli savens ch'jau tir e meglier ch'i va.» Dapi l'uost 2024 è la Tuatschina occupada cun il tir a Bienna e abita ad Evilard sper Magglingen. Là vegn ella trenada da Jan Hollenweger. «A mai plai fitg bain giu qua. Las fins d'emna ch'jau n'hai betg da sajettar vom jau a chasa a Rueras», di Alicia Beer. Sper il sport da prestaziun absolva ella l'emprendissadi mercantil.
Campiunessa da las junioras
Il slogan d'Alicia Beer ch'ins sa leger sin la pagina d'internet uffiziala da Swiss Shooting sa numna: «Jau sajet perquai che la perfecziun fascinescha mai.» Quella fascinaziun sa mussa era cumplainamain en il stan da tir. Surtut era en las concurrenzas. «Sin il titel da campiunessa svizra da las junioras sun jau loscha. El è stà per uschè da dir la recumpensa per tut l'engaschament.» Cun 18 onns è ella ina da las giuvnas en la categoria enfin 21 onns. Uschia è quella victoria tant pli remarcabla e mussa il potenzial da svilup che giascha en la tiradura sursilvana.
Il final sco finamira
Il viadi als Campiunadis da tir d'Europa en Croazia fa Alicia Beer cun ina clera finamira: «Gugent cuntanschess jau il final. Per cuntanscher questa finamira emprov'jau da far tut il pussaivel.» Ella vegn a sajettar il match en trais posiziuns ed eventualmain era la concurrenza en venter e quella dal team cun il caliber pign sin la distanza da 50 meters. Alicia Beer è sa participada il favrer passà al Campiunadi d'Europa dal tir da 10 meters en Bulgaria. Uschia ha ella gia savì giudair l'aria dad in campiunadi internaziunal: «Cun ils resultats na sun jau betg stada cuntenta là. Probablamain vulev' jau damemia e hai uschia fatg memia blera squitsch a mai mezza.» Quella giada èsi auter: In'autra arma ed in'autra distanza.
E lura al Campiunadi mundial?
«La distanza da 50 meters è mia preferida, surtut la concurrenza en trais posiziuns.» La participaziun als Campiunadis d'Europa vul Alicia Beer duvrar per far in ulteriur pass enavant sin plaun internaziunal. La proxima finamira è gia clera: «Gliez fiss il Campiunadi mundial la secunda mesadad dal zercladur vegnent en Germania.» Schebain quella finamira sa verifitgescha na dependa betg mo, ma era, dals resultats en Croazia. Dasper ses engaschament en il center da prestaziun a Bienna ha Alicia Beer era sajettà l'enviern passà cun il team da la Societad da tir Voluntaria Trun en la liga naziunala da 10 meters.